Giovanni Pina 1920 – 餐廳

一嚐大師級甜品 經過如心廣場，與友被其店內陳列的甜品所吸引，姑且一試甜品的確好味。餐廳環境雅致，店員親切，仲免收加一確係難得。 即烤蘑菇火腿水牛芝士拖鞋包三文治(配甜薯條) $128 三文治份量十足，二人分享先食得晒，餡料夾住沙律菜、蕃茄片、火腿、蘑菇、水牛芝士，要無曬儀態咁大啖咬落去先可以一啖過食晒所有餡料，爽呀。 Pasta Set $228 蕃茄忌廉湯 湯底濃郁茄味十足，蕃茄酸甜適中，飲落令人開胃。 大蝦肉醬意粉 肉醬份量足以掛滿意粉，再蓋上一層半溶芝士，香味倍增，三隻大蝦爽口彈牙，意粉亦都唔錯。 精選蛋糕(棋盤) 蛋糕外層舖上椰絲，頂層舖滿忌廉、吉士及朱古力醬。切開入面每層海綿蛋糕均以吉士醬及朱古力醬分隔，混合一齊食味道甜美可口，忍唔住買多件回家食。 經典米蘭咖啡 咖啡杯旁伴上一件提子小曲奇，食完甜品飲啖香醇咖啡，的確幾滿足。

午餐的套餐中餐點配搭不錯。主菜豬手拖鞋包頗有驚喜，麵包軟熟，豬手脆口，醬汁香濃，配菜沙律的黑醋沙律汁也為配菜加分，另外炸蕃薯條也炸得香脆而不油膩。其他所見的意大利麵及飯品也有水準。招牌米蘭咖啡的烘焙也跟連鎖咖啡的口味不一樣，但提供的熱鮮奶份量少了一點。著名的餅食也頗吸引，跟餐的兩份檸檬塔水準口味不平均，其中一份沒啥檸檬的味道，若以一流餅食為賣點，這樣的出品應扣分。總觀此餐廳，出品種類口味頗佳，價錢合理，值得一試。 同一天再到餐廳晚餐，點了海鮮沙律做 starter，主菜點了 all day brunch 和四式芝士薄餅。四式芝士薄餅在香港很少餐廳會做，可能沒有肉和菠蘿，所以不太受歡迎，其實很好吃的，隨薄餅還有蜜糖，這個是整個薄餅好吃的關鍵。在日本旅遊時，每到意大利餐廳都必點這款薄餅，他們總會奉上蜜糖，但在香港一家連鎖薄餅店點四式芝士，上桌問侍應要蜜糖，他覺得我們奇怪，而且還要另收費，最後還是加費要了蜜糖。這裡的 brunch 就是意式的 all day breakfast，烤雞扒也好吃，但因為薄餅實在令人太滿足了，其他的餐點也全被比下去。最後以 Sacher 作結，再配上無咖啡因咖啡，實在飽足。

松露愛好者必食 第一次嚟如心廣場，原來都幾多餐廳。我哋選擇咗呢間Pasticceria Giovanni Pina 1920試吓。 職員都幾親切友善，有小朋友嘅情況下，幫忙安排較好嘅位置。 看看Menu 賣相相當吸引，我地點咗兩個餐，Chicken Set $228 & Pasta Set $208。每個Set 二百幾再加一，Lunch time嚟講算偏貴。 「南瓜忌廉湯配香草麵包」幾好飲，濃濃的南瓜🎃香，飲落有少少南瓜蓉。 「烤焗法國春雞配意大利紅酒汁」，法國春雞幾香口，皮脆肉嫩，係細隻咗啲。 「黑松露野菌忌廉汁意大利粉」，味道竟然是甜甜地，幾好味喎，意大利粉彈牙有口勁，但份量就有點少，但碟就好大🤣 精選蛋糕是「聖安娜」，是蛋糕名剛好叫聖安娜🤣不是從聖安娜買回來的啊 另外叫咗個「意式薩赫蛋糕」$52 朱古力味鬆軟可口 仲有一眼睇中嘅「鮮松露水牛芝士薄餅」$188 有專人即場刨鮮松露，剛好8片，每塊一片。賣相跟餐牌上有點不同，餐牌上是密密麻麻的鮮松露但Size較細，實物較大片，但數量較少。 色、香、味俱全嘅「鮮松露水牛芝士薄餅」，入口啖啖芝士加埋整片松露，好滋味，一口氣可食幾塊呢。 另外叫咗杯「士多啤梨奶昔」俾小朋友，粉紅色賣相深得小朋友歡心。（飲品名忘記了，自己作的） Pasticceria Giovanni Pina 1920 (如心廣場) 地址: 荃灣楊屋道8號如心廣場1樓109-111號舖

荃灣的朋友有福了💖 喺如心廣場開左意大利烘焙百年品牌🤩 @pasticceria_giovanni_pina 裝修緊既時候已經對佢虎視眈眈 蛋糕採用天然酵母 、意大利原裝麵粉及獨特烘焙法製成，咁吸引梗係第一時間衝去食啦!! · 原來佢都仲有唔少主食鹹點供應，揀左個Ciabattach Set，有餐湯、主食、精選蛋糕及餐飲。 · 🥣南瓜蟹肉忌廉湯係好綿好creamy 將香甜既南瓜打成蓉，加入忌廉及蟹肉絲，順滑香濃，超喜歡 · 🌮燒牛肉意大利包三文治伴炸甜薯及蘋果紅菜頭沙律🥗 想講個沙律好好食!! 抗氧化力高既紅菜頭好fresh，感覺都健康好多 · 🍰當日精選蛋糕係Tiramisu，咖啡味道層層漸進，愈食會愈滲出咖啡香味，而且每一層都整得好薄，十分出色 · 另外仲order左2件蛋糕🍰返屋企慢慢嘆🤤 米蘭芝士餅($52)，芝士控一定要試下🧀 芝士味道鹹香突出，口感好細滑❤ 榛子朱古力慕絲($58)，面頭既榛子粒味道比平時食到嘅濃郁，慕絲蛋糕忌廉感好重，幼滑得 瞬間融化，好幸福呀💖 · 特別一提，店內更引入👉意大利最著名咖啡品牌 CAFFE MILAN☕ 下次要試下!! · 📍Pasticceria Giovanni Pina 1920 荃灣楊屋道8號如心廣場商場一期109-111號舖

人氣店舖Pasticceria Giovanni Pina第二家分店已經登陸荃灣，店舖位於荃灣如心廣場一期一樓，在另一家人氣店舖段純貞的斜對面。店舖環境挻美，平日下午去人流不算太多，可以慢慢地享受下午茶☕。 - 💥榛子朱古力慕絲 HKD$58，蛋糕賣相是四方型，面頭還有幾粒果仁，令到口感更豐富。朱古力味道濃郁，甜而油膩，慕絲口感很幼滑，底下的蛋糕鬆軟濕潤。 - 💥蛋白檸檬撻 HKD$52，這個甜品很喜歡吃的，所以要點來吃吃🥰。賣相挻吸引的，味道酸酸甜甜很開胃，中間還有檸檬醬，撻底口感脆身不會很硬。 - 💥維也納忌廉咖啡 HKD$45 /士多啤梨沙冰 HKD$42，兩杯飲品味道各具特色，味道也很濃郁。吃蛋糕最好就是配咖啡☕，既放鬆又享受💕。 - 食物質素和味道不錯，店家沒有加一服務費，價錢可以接受。蛋糕外賣還有9折優惠，所以我們也買了一些回家與家人分享。