玄鮨 – 壽司店

今日收工，有24孝男朋友接放工。一上車見到佢四萬咁口，已經知道肯定有陰謀。 之前我有同佢講過未食過廚師發板，點知佢今次真係帶咗我過嚟銅鑼灣食，上到嚟環境非常整潔乾淨，格調非常高級，未坐低已經對食物超有期待。 前菜已經非常豐富，有甜番薯、魚肝、三文魚咀。除咗甜番薯之外，其他真係未食過！ 甜番薯非常香甜，好好味。本身都有啲擔心魚肝味道可能比較難接受，但真係一試上癮，濃郁得黎唔會膩，味道極佳之餘又齒頰留香，正到不得了。 三文魚咀對我來講又係非常新鮮嘅一道菜，入口爽脆香濃，加埋特別條配嘅醬汁，酸酸地非常開胃。 食完前菜就到刺身，淨係睇張相都知道不得了。 左上角嗰隻生蠔叫做令和之怪物，蠔如其名超級大隻。我男朋友本身唔係幾鍾意食生蠔，但係都覺得好好食。 銀鱈魚刺身，喺出面真係食唔到咁高質嘅銀鱈魚，唔單止新鮮咁簡單，味道香濃，入口即化，真正可以試到銀鱈魚本身嘅味道，而唔會好似出邊咁唔知食緊啲乜。 六聖子夾牙蔥，又係好得意嘅配搭，本身其實我唔係好鍾意食蔥，但呢一個配搭剛剛好，超級Fresh，仲可以清一清之前生蠔同銀鱈魚刺身嘅味道，為準備食大拖羅準備味覺。 大拖羅，識食吞拿魚嘅人都知道，一件好嘅吞拿魚刺身，必須要有豐富味道層次，而且回甘。呢一件大拖羅非常出色，層次豐厚，回甘味極濃！會令人唔捨得飲嘢整走個味。 新鮮活帶子，食得出材料新鮮，富有彈性。 之後就到熟食，首先有鮑魚配師傅嘅特製醬汁。鮑魚好大隻，師傅特製醬汁係必食！醬汁用左昆帶去調配，加上牛油味道濃郁，同鮑魚嘅質感非常配合。 金鯛魚又係好出色嘅一道菜，眼看簡單，但職員介紹完先知道製作工序一啲都唔簡單。魚皮先經油炸，可以連鱗片一齊食，而且非常脆。魚肉幼滑香甜，配上特製海膽醬汁一絕。另外佢哋仲有配一根紫蘇葉，將紫蘇葉花冧搣出黎放落去，會為食物味道加添層次。 蟹肉茶碗蒸，裏面非常足料，淡淡蟹肉。 食完熟食，就到壽司。不得不讚嘅係佢哋每一道菜嘅擺盤都好用心，全部都好靚。 牡丹蝦壽司配黑松露醬，鍾意食牡丹蝦嘅人肯定唔會失望，蝦味鮮配上黑松露醬，形成強烈對比，味道衝擊！ 手釣池魚、右口魚、鯖魚太壽司，呢三隻我都未食過，冇辦法好細緻比較，但係三款壽司都係一試便愛上，有機會去日本希望可以搵返出嚟食真啲。 重頭戲就係中間嘅海膽壽司，佢哋嘅海膽係日本排名第八嘅海膽。我諗好多人都會有同感，出面食到嘅海膽，都係淡而無味，頂多有dd咁多多退微甜，但佢呢隻海膽嘅甜味真係不得了，非常濃郁，有海水味，香甜之餘入口即溶，果然名不虛傳！ 最後仲有個豆腐魚湯，職員話所有用嚟熬嘅魚全部都係日本嚟，魚味又濃郁，一啲都唔會腥，真係好清甜。 食完咁多嘢，當然仲有甜品，包括紅豆蓉綠茶蕨餅、日本士多啤梨、海鹽雪糕，除咗日本士多啤梨偏酸少少，其餘兩隻都維持高質，令成餐飯完成度變得更高！ 雖然呢間餐廳唔算平，但論食物質素，佢哋絕對做到百分之百！唔單只係高質咁簡單，而係佢哋嘅食材分分鐘我哋喺外面冇可能買得到，絕對頂級享受。 值得一提係佢哋服務質素，佢哋職員服務態度超級好，除咗細心有禮貌之外，每上一道菜都會耐心解釋，就連進食次序都一一解釋清楚，簡直係六星級享受。 今餐真係非常難忘嘅一餐，因為食到好多我從來未食過嘅食物同刺身，係我心目中高質同優質首選。

呢間喺銅鑼灣既日本餐廳曾連續幾年獲得米芝蓮推介，今次就專登過嚟食omakase，師傅會根據時令嘅食材同埋客人嘅口味嚟到去度身訂造廚師發板，非常用心，用嘅材料都係最頂級嘅。 Omakase有前菜、刺身、壽司、煮物、湯同埋甜品，好豐富。其中一樣係海膽，令我非常難忘，海膽係拍賣級別嘅排第一既，食落去係完全冇腥味，入口係清甜既感覺，完全係另一個層次，而且師傅仲非常大方咁俾咗好多海膽我哋，勁滿足。 每一道菜都係精心炮製，例如壽司同刺身都係會配搭唔同嘅自家調製嘅醬汁，連前菜八方煮都用左名貴既食材，有鮑魚、花膠、同埋海參，好高級。

久唔久都會約埋朋友去銅鑼灣*玄鮨*食Omakase嘅，我喜歡食Omakase嘅原因好簡單，就係每次都會享用倒當日最時令，最新鮮嘅食材，每次都會帶比我不同驚喜。尤其係坐bar枱，更加可以同師傅互動，師傅每上一度食材都會以好溫文聲線介紹食材嘅來源地，不同配搭嘅效果，食Omakase就係要食呢種專業態度，值回票價。 前菜- 🥢凍鮑魚，肉質煙韌，濃郁鮑味； 🥢汁煮金線鯛 ，吸收晒湯汁精華，更加鮮味。 刺身： 🦪令和怪物 ，坂月灣生蠔配柚子酸汁，生蠔較為大隻，先吃上半部較為爽口，下半部口感creamy，整體海水味唔太重，柚子酸汁亦成功將生蠔🦪嘅鮮味再提升。 🥢蜜柑鯛，帶淡淡橘香，下邊伴骨膠湯汁，更起提鮮作用。 🥢刺身級海狼魚，入口黏滑有咬口。 🥢銀鱈魚 - 北九洲刺身級數嘅銀鱈魚，入口非常順滑，油花四濺，肉質有點咬口靭性。 🥢拖羅 - 近鮫位位置，肉質較爽身，油脂分布均勻，呢個油花比起銀鱈魚更加之豐富，油花更加甘香，簡直係極上刺身 和食 ： 鐵板燒大蝦，啖啖肉好有黑椒燒烤風味，爽口夾彈牙，帆立貝亦好新鮮。 🍣鮮帆立貝壽司 ，經炙燒過，更帶一份焦香，底部有梅子鹽作調味；池魚🍣，魚的油分較少，口感不油不膩，肉質紮實有口感；俄羅斯牡丹蝦 🍣比起一般牡丹蝦更加爽口黏滑，上面鋪上帶微酸嘅啫喱凍作調味，發揮提鮮效果；北海道海膽 🍣，色澤呈金黃，味道濃郁，口感較實，味道甘甜。 以不同部位嘅日本上等魚熬製而成，所有魚嘅精華都集於一身，骨膠非常非常之豐富，入口順滑、濃郁又黏杰濃滑。 🍈日本直送靜岡密瓜 - 又甜又爆汁。

🇭🇰Hong Kong Average expense pp: HKD$1000-2200+ 📍Address: 玄鮨, Causeway Bay 呢間餐廳真係非常細心，一坐低就會問客人有咩特別嘅飲食喜好。之前已經同朋友嚟過一次，因為佢哋嘅食材係由日本空運至香港，非常新鮮，食過返尋味，所以今次係第二次到訪！ 前菜係新鮮日本蕃茄，味道鮮甜，感覺上十分清爽。蟹肉豆腐嘅蟹膏味，非常濃郁。魷魚好新鮮，意外地好食！ 刺身方面，師傅我安排好由清新到濃味嘅次序食起，分別有池魚、青魚、赤陸魚、北九州銀雪魚、劍魚腩去到拖羅。坊間嘅青魚多數以熟食嘅方式比較多。赤陸魚配搭粟子醬，清甜得黎又多油脂。北九州銀雪魚用上咗黑松露，令到魚油更重。劍魚腩反而比較爽身 ，依然好新鮮。最後，拖羅配搭沖繩菠蘿漬，呢個組合幾特別。 壽司方面，鳥貝壽司有柚子皮，都幾清新爽口。陸扇子用左幾特別既和里醬。金目調用左柚子胡椒，可以帶出3種層次香味。好多人嚟呢間餐廳就係為咗食牡丹蝦，因為佢哋採用虎山白蝦，果然非常新鮮，值得一讚係A5和牛，採用左柑橘籽啫喱，可以平衡返和牛嘅油膩感。 呢個omakase嘅亮點就係佢哋嘅海膽，配上淡雪鹽、雪葉 （腐竹）同埋高級紫菜，因為係拍賣級別嘅海膽，味道比起坊間食到嘅更加鮮甜同埋新鮮。鍾意食海膽嘅你唔好錯過。最後魚湯可以暖胃。甜品都用咗日本入口嘅蜜瓜同埋芝麻慕絲，師傅仲會細心問你飽唔飽，下次一定會再嚟

第五波疫情搞到又要停晚市堂食，唔少餐廳都轉型做外賣，但對於omakase黎講，為咗保持質素，好難轉做外賣 之前食過兩次玄鮨都超好食，今日人日就再去課金支持下🏻 餐廳推出咗午後時段嘅omakase，$1580/位，價錢比原本晚市嘅omakase平咗好多，但依然有前菜、刺身、壽司、熟食、魚湯/烏冬同埋甜品。 今日為我地準備omakase嘅係麟師傅，先喺度再次多謝佢嘅細心，每次都等我地食完一件刺身/壽司先準備下一件，唔會有種催你快啲食完嘅感覺，可以細細品味。 前菜有三碟：馬糞海膽配蟹肉豆腐、磯燒鮑魚及豚肉生姜燒，海膽新鮮質感軟滑，鮑魚比上兩次來訪煮得更腍更好食，豚肉生姜燒亦是水準之上。 第一件刺身係令和之怪物生蠔，size巨形自然不在話下，麟師傅亦細心將蠔切開一半方便食用，上半部爽口清新，下半部非常creamy，同樣係令和怪物但呢道嘅日式醬汁就令佢嘅味道更有層次。 第二件刺身係北海道帆立貝配炙燒貝柱，貝柱的焦香同帆立貝刺身嘅清甜味形成好大嘅對比，亦比較有𡁻口，加上檸檬岩鹽清新好食。 第三件刺身係薄切金目鯛茗荷卷，茗荷係日本嘅薑，有爽口嘅感覺但唔會有平時煮餸啲薑嘅辛辣味，加上用金目鯛煮成嘅特製湯汁，又香濃又有滿滿嘅骨膠原🤤🤤 第四件刺身係新鮮嘅劍魚腩配梅子鹽，而家市面上嘅劍魚刺身已經好少見，更何況係新鮮、非急凍嘅劍魚，新鮮嘅劍魚唔會有雪水，肉質軟滑，但冇拖羅嗰啲咁重油分，好啱我嘅口味。 最後一件刺身係藍鰭大拖羅，比起晚市呢件拖羅油脂冇咁多，比較似赤身，但近尾部分嘅油脂麟師傅細心切開好多刀再炙燒處理，配埋京蔥解膩啱啱好。 刺身同壽司之間嘅間場熱食係我地最鍾意嘅金目鯛立鱗燒，半煎炸嘅烹調手法令到所有魚鱗卷起，咬落脆卜卜比起任何炸物都出色，配上略帶甜味嘅紫蘇花味道更有驚喜。 第一件壽司係新鮮嘅北寄貝配日本岩鹽，平時食開嘅都係熟嘅北寄貝，會好韌好難咬開，新鮮嘅就唔同，非常爽甜。食完之後麟師傅用剩返嘅裙邊整多咗個小食俾我地，配上欖醬非常開胃。 上第二件壽司時師傅有問我地需唔需要調整wasabi同壽司飯量，非常貼心。第二件係赤鯥配高山梅醬，兩者夾嘅程度係我覺得梅醬似係魚肉本身嘅肉汁，可以話係呢餐嘅三甲之一。 第三件係右口魚配鰻魚汁，食到呢度師傅見我地都唔太怕膩（其實我怕但佢嘅調味真係平衡到各種魚類嘅油脂👍🏻👍🏻），都大膽俾啲重油分嘅魚我地試，炙燒過嘅右口魚俾油脂包覆住，完全做到入口即融嘅感覺，食完覺得超幸福🥺🥺🥺 第四件係牡丹蝦壽司，蝦身晶瑩通透，質感爽滑，配上蝦膏加香蔥煮成嘅醬汁，濃郁同清甜嘅對比好強烈。 去到最後一件壽司我地都比較飽，所以師傅就冇加到飯，整咗一個純海膽嘅小碗俾我地，呢日用嘅係全日本排名第18嘅海膽，一板已經價值不菲，但麟師傅超慷慨俾咗好多我地🤫🤫真係超好食～～～～完全顛覆咗我地對海膽嘅印象 最後嘅魚湯係用多種魚頭魚骨淆製而成，非常濃郁，喺呢個天氣飲就更加舒服。 甜品方面有鹽味焦糖蛋糕同mocha蛋糕，味道比起出面嘅餐廳冇咁甜，係個比較輕鬆嘅結尾～