去年11月尾發生的大埔宏福苑五級火造成嚴重傷亡、近2000戶受影響，市民積極捐助支援。Tyson Yoshi與太太Christy事後宣布捐出價值100萬元家電產品，並在不同階段提供協助，期望幫助受災居民逐步重建家園。不過，近日有災民的家屬因未能獲得所需電器，在私訊中表達不滿，並揚言若無回覆，便將事件報上《東張西望》。
Tyson Yoshi將相關留言截圖上載至Ig限時動態。該網民在訊息中表示：「聯絡了Winnie，佢話剩係得廚具冇小型電器，其實我婆婆最急需係要抽濕機、空氣清新機同微波爐，請問Tyson可唔可以幫到手呢？祝新年快樂。」該網民後來再度留言表示失望，並批評捐贈安排未能兌現承諾：「我真係不吐不快，你哋出個post又話幫啲災民一啲電器用品。我同你哋講完跟住你叫我聯絡Winnie，跟住Winnie email我問我要咩電器，跟住我答咗佢，跟住就冇覆過我啦，跟住我打電話畀佢就話你哋只係捐咗一啲廚房用品，話冇我哋需要嘅電器。」該網民更進一步批評：「咁你即係開頭個post就呃人啦，將我哋啲災民踢嚟踢去，跟住問咗成個月，最後乜都冇得個吉。你哋就開post話晒畀人哋聽捐咗咁多嘢，但係根本就將我哋踢嚟踢去問咗咁耐都係冇嘅。如果你唔回覆我嘅話，咁我就將整件事報上《東張西望》，等大家公眾評論一吓。」
Tyson Yoshi在截圖下方留言︰「資源有限。我同團隊其實都係想可以最大化咁樣幫助到最多嘅人… 有啲朋友攞唔到佢哋嘅嘢，我真係好抱歉，但係真係要情緒勒索同埋要脅咩？」他及後再於限時動態出Post說︰「個人能力有限，但一直希望在能力所及之下，盡量幫助更多有需要的人。因此，在今次支援行動中，團隊最終決定與救世軍合作，並將一百萬善款集中用於一個能夠惠及最多災民的方案。我們理解部分求助者對某些產品的需求，但在資源需作集中安排的情况下，並以惠及最多有需要的人為考量，部分電器項目實在未能納入支援範圍，亦對未能一一回應感到遺憾。對於溝通過程中出現的不同情緒與感受，我們表示理解，也希望彼此能以理性、互相尊重的方式交流，這亦是我們一直所期望的。 最後，懇請大家理解相關安排，並感謝大家一直以來的關心與體諒。」
相關新聞︰Tyson Yoshi夫婦捐百萬家電 助宏福苑災民逐步恢復生活